तीन पुर्व क्रिकेटरलाई ‘आईसीसी हल अफ फेम’ सम्मान
काठमाडौं – आईसीसीले तीन पूर्व क्रिकेटरलाई ‘आईसीसी हल अफ फेम’ सम्मान दिएको छ । आईसीसीले बुधबार दक्षिण अफ्रिकाका एबी डिभीलियर, इङल्याण्डका एलस्टर कुक र भारतकी नितु डेभिडलाई ‘आईसीसी हल अफ फेम’ सम्मान दिएको हो ।
डिभीलियर्सले दक्षिण अफ्रिकाका लागि ११४ टेस्ट, २२८ एकदिवसीय र ७८ टी-२० खेल खेलेका छन् । उनले टेस्ट क्रिकेटमा ८ हजार ७६५। एकदिवसीय खेलमा ९ हजार ५७७ र टी-२० मा १६७२ रन बनाएका छन् ।
त्यस्तै इङ्ग्ल्याण्डका पूर्व खेलाडी कुकले १६१ टेस्टमा १२ हजार ४७२ रनम ९२ एकदिवसीय खेलमा ३ हजार २०४ रन र ४ टी-२० मा ६१ रन बनाएका थिए ।
त्यसैगरी भारतकी नितु डेभिडले १० टेस्टमा ४१ विकेट लिएकी छन् भने ९७ एकदिवसीय खेलमा १४१ विकेट लिएकी थिइन् ।
आईसीसीले हरेक वर्ष आ-आफ्नो देशबाट विशिष्ट योगदान गरेका क्रिकेटरलाई ‘आईसीसी हल अफ फेम’ बाट सम्मान गर्ने गरेको छ । अहिलेसम्म विश्वका कुल ११५ क्रिकेटरले यो सम्मान पाएका छन् ।
अहिलेसम्म सबैभन्दा बढी इङ्ग्ल्याण्डका ३३ क्रिकेटरले ‘आईसीसी हल अफ फेम’मा स्थान बनाएका छन् भने अस्ट्रेलियाका २९, वेस्ट इन्डिजका २१, भारतका १०, पाकिस्तान र दक्षिण अफ्रिकाका ७-७, श्रीलंकाका ४, न्युजिल्याण्डका ३ र जिम्बाबेका एक खेलाडी यस सूचीमा रहेका छन् ।
आईसीसीले २००९ देखि ‘आईसीसी हल अफ फेम’ सम्मान घोषणा गर्न थालेको हो ।
