पाँच दिनदेखि सुनको मूल्य लगातार वृद्धि, आज कतिमा हुँदैछ कारोबार ?

सुनको मूल्य आज पनि बढेको छ । गएको सोमबारदेखि नेपाली बजारमा सुनको मूल्य लगातार बढिरहेको छ ।

आज सुनको मूल्य तोलामा एक हजार पाँचसय रुपैयाँ बढेर एक लाख ६५ हजार पाँचसय रुपैयाँ पुगेको छ । यसअघि बिहीबार सुनको मूल्य एक लाख ६४ हजार रुपैयाँ थियो ।

गत कात्तिक १५ गते सुनको मूल्यले हालसम्मकै महँगो कीर्तिमान बनाएको थियो । त्यो दिन सुन प्रतितोला १ लाख ७१ हजार रुपैयाँ पुगेको थियो ।

त्यसयताका दुई सातामा सुनको मूल्य ११ हजार रुपैयाँ घटेर एक लाख ६० हजारसम्म झरेको थियो । विगत पाँच दिनयता भने सुनको मूल्य लगातार बढिरहेको छ ।

आज चाँदीको मूल्य भने घटेको छ । हिजो एक हजार नौसय ५० रुपैयाँमा कारोबार भएको चाँदीको मूल्य आज तोलामा १० रुपैयाँ घटेर एक हजार नौसय ४० रुपैयाँमा झरेको छ ।