सुतिरहेका बेला साबेल प्रहार गरी साथीको हत्या

मकवानपुरमा एक व्यक्तिले आफ्नै साथीको हत्या गरेका छन् । मनहरी गाउँपालिका(६, प्रतापुर लच्का निवासी जितबहादुर मोक्तानलाई अम्मरबहादुर लोप्चनले साबेलले प्रहार गरी हत्या गरेका हुन् ।

अम्मरबहादुरले घरमा सुतिरहेका साथी मोक्तानमाथि साबेल प्रहार गर्दा उनको टाउको र खुट्टामा गम्भीर चोट लागेको थियो । गम्भीर घाइते मोक्तानको उपचारको क्रममा भरतपुर अस्पताल चितवनमा मृत्यु भएको प्रहरीले जनाएको छ ।

प्रहरीका अनुसार, अम्मर बहादुर र जितबहादुर दुवै सँगै मजदुरी गर्ने साथी हुन्। प्रायः उनीहरु जितबहादुरकै घरमा सँगै सुत्ने गर्थे ।

गएराति जितबहादुरकै घरमा उनीहरु सुतेका थिए । आपसी विवादको क्रममा अम्मर बहादुरले जितबहादुरलाई कुटपिट सुरु गरेका थिए । सावेल प्रहारसहितको कुटपिटबाट गम्भीर घाइते भएका जितबहादुरलाई उपचारका लागि भरतपुर सरकारी अस्पताल, चितवन पठाइएको थियो ।

उपचारकै क्रममा उनको मृत्यु भएको जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक (डीएसपी) श्यामु अर्यालले जानकारी दिए । उनको शव अहिले चितवनस्थित सरकारी अस्पतालमा राखिएको प्रवक्ता अर्यालले बताए ।

प्रहरीले कुटपिट गर्ने अम्मर बहादुरलाई नियन्त्रणमा लिई आवश्यक कारबाही प्रक्रिया सुरु गरिएको जनाएको छ। घटनाबारे थप अनुसन्धान भैरहेको डीएसपी अर्यालले बताए ।