कीर्तिपुरमा माओवादीको चुनावी सभा (भिडियो)
नेकपा माओवादी केन्द्रले कीर्तिपुरमा आयोजना गरेको चुनावी सभा सुरु भएको छ ।
कीर्तिपुरस्थित नगाउँ दोबोटोमा आयोजित भएको चुनावी सभामा सहभागी हुन पार्टी अध्यक्ष पुष्पकमल दाहाल प्रचण्ड, उपाध्यक्ष अग्निप्रसाद सापकोटा, नेकपा एकीकृत समाजवादीका वरिष्ठ उपाध्यक्ष राजेन्द्रप्रसाद पाण्डे लगायतका शीर्ष नेताहरूको उपस्थिति छ ।
कीर्तिपुर नगरपालिकामा माओवादीबाट प्रा.डा. शिवशरण महर्जन उम्मेदवार छन् । उनलाई एकीकृत समाजवादी र अशोक राई नेतृत्वको जनता समाजवादी पार्टीले समर्थन गरेको छ ।
आज माओवादीसहित एमाले, कांग्रेसले पनि कीर्तिपुरमा सभा आयोजना गरेका छन् । कांग्रेसको सभामा महामन्त्रीद्वय गगन थापा र विश्वप्रकाश शर्मा पुगेका छन् । यसैगरी एमाले सभामा महासचिव शंकर पोखरेल छन् ।
स्वतन्त्र सांसद राजमान महर्जनले आजै अपरान्ह ४ बजेपछि बागभैरवमा चुनावी सभा राखेको छ । सो सभामा धरान उपमहानगरपालिकाका मेयर हर्क साम्पाङसहितले सम्बोधन गर्दैछन् ।
कीर्तिपुर नगरमा यसपटक ठूला दल र स्वतन्त्र उम्मेदवारको टक्कर देखिन्छ ।
आगामी १६ मंसिरमा हुने उपनिर्वाचनका लागि प्रचार प्रसारको आज अन्तिम दिन हो ।
