विराटनगर किंग्सविरुद्ध सुदूरपश्चिम रोयलको शानदार जित
नेपाल प्रिमियर लिगअन्तर्गत मंगलबारको पहिलो खेलमा विराटनगर किंग्सलाई पराजित गर्दै सुदूरपश्चिम रोयल्सले नेपाल प्रिमियर लिग (एनपीएल) मा विजयी सुरुवात गरेको छ ।
मंगलबार कीर्तिपुरस्थित त्रिवि मैदानको पहिलो खेलमा सुदूरपश्चिमले विराटनगरलाई ९० रनले पराजित गर्यो । सुदूरपश्चिमले दिएको १८३ रनको लक्ष्य पछ्याएको विराटनगरले १६.१ ओभरमा ९२ रनमै अलआउट भयो ।
विराटनगरले कुनै बेला सम्हालिएर ब्याटिङ गर्न सकेन । विराटनगरका बसिर अहमदले २४, निकोलस किर्टोनले १५, क्रिस सोलेले १० र अनिल खरेलले १० रन बनाए । अरुले दोहोरो अंकमा रन जोड्न सकेनन् ।
आक्रामक ब्याटिङ गरेको सुदूरपश्चिमले बलिङमा पनि उत्कृष्ट प्रदर्शन गर्यो । विराटनगरविरुद्ध फराकिलो जीत निकाल्ने क्रममा अविनाश बोहोरा र स्कटले तीन/तीन, ब्रान्डन, इशान पाण्डे र सैफ जैबले एक/एक विकेट लिए ।
यसअघि टस हारेर ब्याटिङको निम्तो पाएको सुदूरपश्चिमले कप्तान दीपेन्द्र सिंह ऐरीको आक्रमक ब्याटिङमा १८२ रन बनाएको थियो ।
