नयाँ सरकार गठनबारे छलफलमा तालिवानी नेता

तालिवान समूहले त्यहाँको शासन सत्ता हातमा लिएपछि नयाँ सरकार गठनका बारेमा छलफल गरिरहेका बताएको छ ।

तालिवानका संस्थापकमध्येका एक नेता मुल्लाह अब्दुल गनी बरादर नयाँ सरकार गठनको छलफलका लागि गत शनिबार नै राजधानी काबुल पुगेका बताएको छ । अफगानिस्तानका अधिकारीलाई उद्धृत गर्दै त्यहाँका स्थानीय सञ्चारमाध्यमले तालिवानले नयाँ सरकार गठनका लागि आवश्यक परामर्श थालेको जनाएका छन् ।

गनी बरादर तालिवानका प्रभावशाली नेताका रूपमा चिनिन्छन् । उनले नै अफगानिस्तानबाट अमेरिकी सेना फिर्ता गर्ने विषयमा यसअघिको शान्ति वार्ताका क्रममा तयार गरेको सम्झौतामा हस्ताक्षर गरेका थिए । यति बेला विश्व समुदायले नै अफगानिस्तानमा गठन हुने तालिवानको सरकार कस्तो हुन्छ भन्ने बारेमा निकै चासो पूर्णरुपमा हेरेका छन् । उता तालिवानले भने अफगानिस्तानमा समावेशी सरकार गठन गर्ने बताइरहेका छन् ।

तालिवानहरुको यो भनाइप्रति भने विश्व समुदाय विश्वस्त हुनसकेको छैन । यो वाचा गरेको भए पनि यसबारे धेरैमा आशंका व्यक्त भइ आएको छ । यसैकारणले पनि जतिसक्दो चाँडै सरकार गठन गर्न तालिवान लागि परेको बताइएको छ । यतिखेर भने तालिवानले अशरफ घानीको पूर्ववर्ती सरकारसँग मिलेर सङ्कटको व्यवस्थापन गरिरहेका बताइएको छ ।

बरादरबाहेक कट्टरवादी धारका हक्कानी नेटवर्कका नेता खलिल हक्कानी पनि यतिबेला काबुलमा छन् । उनको नाम अमेरिका र संयुक्त राष्ट्रसङ्घको फरार आतङ्कवादीको सूचीमा पनि रहेको छ ।

अघिल्लो हप्ता अफगानिस्तानलाई तालिवानले कब्जा गरेपछि अफगानिस्तान बाहिरसमेत रहेका उच्च तालिवान नेता स्वदेश फर्किन थालेका छन् । तालिवानका कतिपय नेता कतारमा रहेका बताइएको थियो । उनीहरु पनि अहिले स्वदेश फर्किरहेका छन् ।

हाल तालिवानका चार संस्थापक नेता रहेका बताइएको छ र तीमध्येका एक जना बरादर रहेका र उनी गत शनिबार पहिला कान्दहार विमानस्थल आएर त्यसपछि काबुल ओर्लिएका बताइएको थियो ।

अफगानिस्तानको कान्दहार शहरमा तालिबान धेरै रहेका छन् । तालिवानले कान्दाहारलाई आफ्नो उद्गमस्थल मान्ने गर्दछन् ।