२४ घण्टा नबित्दै जी-बबको गीत युट्युब ट्रेन्डिङको शीर्षस्थानमा
र्यापर जी–बब उर्फ सुदीप भण्डारीले गाएको गीत युट्युब ट्रेन्डिङको पहिलो नम्बरमा परेको छ। अभिनेता अनमोल केसी र सुहाना थापाको फिल्म ‘ए मेरो हजुर ४’का लागि गाएको गीत एक दिन पनि नबित्दै ट्रेन्डिङको पहिलो नम्बरमा परेको हो ।
‘भाग भाग अब धेर न दे धाक’ बोलको गीत शनिबार बेलुका सार्वजनिक भएको हो । यो समाचार तयार पार्दासम्म भिडिओलाई झण्डै ९ लाख पटक हेरिसकिएको छ । साथै, भिडिओले १ लाख १७ हजार लाइक पाएको छ भने ५ हजार ७ सय बढी कमेन्ट पाएको छ।
संजय लामाले छायांकन गरेको भिडिओलाई साहिल खानले सम्पादन गरेका छन् भने यसमा रामजी लामिछानेको कोरियोग्राफी रहेको छ।
‘मिलेन लेबल तेरो बाउ बोला ए’ र्याप गाएर चर्चामा आएका भण्डारीको तारिफ भैरहेको छ । सो गीत रहेको फिल्म ‘ए मेरो हजुर ४’ वैशाख १ गतेबाट प्रदर्शन हुँदैछ।
