बागलुङका काँग्रेस नेता पौडेलद्धारा पार्टी परित्यागको घोषणा

नेपाली कांग्रेसका केन्द्रीय सदस्य किरण पौडेलले पार्टी परित्याग गरेका छन् । प्रधानमन्त्री समेत रहेका सभापति शेरबहादुर देउवाको विवेकमा प्रश्न उठाउँदै उनले कांग्रेसको सदस्य समेत नरहने गरी राजीनामापत्र बुुझाएका हुन् । सभापति देउवालाई सम्बोधन गरेर कांग्रेसको इमेलमा राजीनामापत्र पठाएको उनले बताएका छन् ।

“मेरो जीवनको ४४ वर्ष नेपाली कांग्रेसमा खर्चिएको छु । १२औँ महाधिवेशनदेखि लगातार देउवाको टिमबाट केन्द्रीय सदस्य लडेर उहाँकै टिमबाट १४औँ महाधिवेशनमा केन्द्रीय सदस्य निर्वाचित भएको हुँ,” पौडेलले भने, “तर, टिकट वितरणमा उहाँमा विवेक देखिएन । पटक–पटक विवेकहीन निर्णय गर्ने पार्टीमा आबद्ध हुनु ठिक नलागेपपछि यो पार्टीमा नरहने निर्णय गरेको हुँ ।”

महामन्त्री वा पार्टीका अरू कोही व्यक्तिसँग आफ्नो कुनै गुनासो नरहेको भन्दै उनले सभापति देउवाकै विवेकमा प्रश्न रहेको बताएका छन् । पौडेलले कांग्रेस पार्टी कार्यालयका मुख्य सचिव मार्फत सभापति शेरबहादुर देउवालाई राजीनामा पत्र लेखेका छन् । उनले पार्टी निश्चित व्यक्तिको गोटी बनेको आरोप समेत लगाएका छन् ।

२०३५ सालदेखि नै राजनीतिमा लागेका पौडेलले ४४ वर्ष लामो कांग्रेससँगको आबद्धता परित्याग गरेका हुन् । बागलुङ १ मा गठबन्धनबाट राष्ट्रिय जनमोर्चाका चित्रबहादुर केसी उम्मेदवार बनेका छन् ।

बिषय: राजिनामा दिएको बारे।