• २०७७ मङ्सिर ८ सोमबार

भक्तपुरको प्रसिद्ध खः मेय् जात्रा सम्पन्न

महिषासुरका रुपमा राँगोको बध गर्ने परम्परा

भक्तपुरमा नवमीको मध्यराति मनाइने प्रसिद्ध खःमेय् अर्थात् राँगो जात्रा गएराति सम्पन्न भएको छ ।

धार्मिक एवं सांस्कृतिक दृष्टिले महत्वपूर्ण मानिने सो जात्रा महिषासुर दैत्यको प्रतीकका रूपमा गठेमंगलका दिन ल्याएर भक्तपुरको नवदुर्गा मन्दिर प्रांगणमा बाँधेर राखिएको राँगोलाई नवमीको राति बध गरी मनाइने परम्परा रहिआएको छ । राँगोलाई लखेट्दा दायाँबायाँ सुकुन्दा बालेर सँगै दौडिने परम्परा छ । महानवमीको राति नवौँ देवी त्रिपुरासुन्दरी प्रकट भई नवदुर्गा भवानी पूर्ण हुने हुँदा परम्परागतरूपमा खःमेय्को बध जात्रा मनाउने प्रचलन रहेको पूजारीको भनाइ छ । बध गरिएको सो राँगोको मासुको टुक्रा प्रसादका रूपमा घरमा लगेर सुकुटी बनाई धूलो पारेर घ्यूमा मुछेर धूप बनाई बाल्ने गरिन्छ । लक्ष्मीपूजाका दिन सो धूप बालेमा भूतप्रेत नलाग्ने, शत्रुनाश हुने र घरमा लक्ष्मीको बास हुने जनविश्वास छ । गठेमंगलका दिन नवदुर्गा मन्दिरमा ल्याएर पालिएको महिषासुर दैत्यको प्रतीक खःमेय अर्थात राँगोलाई नवदुर्गा मन्दिरबाट जाँड खुवाएर मत्ताएर अबिर दलेर दौडाउँदै, लखेट्दै ब्रह्मायणी मन्दिर पुर्याएर बध गरेपछि रातिदेखि नै यो जात्रा शुरु हुने गर्दछ ।

खः मेय जात्रा समापन भएसंगै प्रत्येक वर्ष विजया दशमीको दिन भक्तपुर–१ च्यामासिंहस्थित ब्रह्मायणी मन्दिरमा लाग्ने ब्रम्हायणी जात्रा मध्यरातिदेखि शुरु भएको छ । नवदुर्गाको शक्तिपीठका रूपमा मानिने ब्रम्हायणी मन्दिरमा नवदुर्गा प्रकट हुने जनविश्वासअनुरुप परम्परादेखि नै विजयादशमीको दिन भव्य मेला लाग्ने गर्दछ । यस वर्ष कोरोना संक्रमणको जोखिमका कारण अघिल्ला वर्षको तुलनामा दर्शनार्थीहरु कम देखिएका छन्   । भक्तपुर नगरपालिकाले दर्शनार्थीहरुलाई मन्दिर प्रवेशमा रोक लगाएको छ । मन्दिरभित्र जान नपाएपछि श्रद्धालुले बाहिरै बत्ती बाल्ने र पूजा गर्ने औपचारिक विधि पूरा गरेका छन्  । मन्दिरमा जमरा, हाँसको फुल, हाँस, बोका, कुखुराको भालेको बलिसमेत दिने गरिन्छ ।

प्रतिकृया दिनुहोस

सम्बन्धित समाचार

ताजा अपडेट

अर्थ / वाणिज्य

समाचार