रोल्पामा एक महिलामाथि सामुहिक बलात्कार गरेको आरोपमा तीन जना पक्राउ परेका छन्। पक्राउ पर्नेमा कैलालीको लम्कीचुहा नगरपालिका–२ बलचौरका २३ वर्षीय अनिल वादी नेपाली, सोही ठाउँका २० वर्षीय सुनिल वादी र सल्यानको कालिमाटी गाउँपालिका–५ हात्तिदमारका ४४ वर्षीय धिरज भनिने धनबहादुर कामी रहेको रोल्पाका निमित्त प्रहरी प्रवक्ता प्रहरी निरीक्षक कृष्ण श्रेष्ठले बताए।
पक्राउ परेका तीनै जना रोल्पाको माडी गाउँपालिका – ६ लाप्चुङस्थित निर्माणाधीन मदन भण्डारी सड्क खण्डको कलर्भट मर्मतको काममा खटिँदै आएका मजदुरहरु हुन्। वैशाख २२ गते बेलुका साढे ६ बजेतिर जिल्लाको सुनिलस्मृति गाउँपालिका – २ की ४० वर्षीया एक महिला आफन्तीको घर माडी गाउँपालिका – १ चिहानडाँडाबाट जंगलको बाटो हुँदै पैदल लिबाङ जाँदै थिइन्।
जंगलको बाटो हिँड्दै गर्दा तीन जना मिलेर सामूहिक बलात्कार गरेको पीडितको जाहेरीमा उल्लेख छ। पीडित महिलाले वैशाख २४ गते आफूमाथि भएको घटनाबारे जिल्ला प्रहरी कार्यालय रोल्पामा पुगेर लिखित रुपमा केटानी जाहेरी दिएकी थिइन्।
