अमेरिकी राष्ट्रपति डोनाल्ड ट्रम्पले क्यानाडासँग व्यापार वार्ता पुनः सुरु गर्न आफूलाई कुनै हतार नभएको बताएका छन् ।
पत्रकारहरूले अमेरिकी मध्यावधि निर्वाचनअघि क्यानाडासँग व्यापार वार्ता पुनः सुरु हुने सम्भावनाबारे प्रश्न गरेपछि राष्ट्रपति ट्रम्पले तत्काल त्यसबारे कुनै निर्णय नभएको बताएका हुन् ।
मरिन वनतर्फ प्रस्थान गर्नुअघि सञ्चारकर्मीसँग कुरा गर्दै ट्रम्पले क्यानाडाले अमेरिकासँग वर्षौंदेखि ‘धेरै नराम्रो व्यवहार’ गरेको आरोप लगाए। उनले भविष्यमा व्यापार सम्झौता गर्न क्यानाडा अमेरिकासँग ‘इमानदार’ हुनुपर्ने बताए।
ट्रम्पले क्यानाडाले अमेरिकाबाट ठूलो मात्रामा शुल्क लिने गरेको आरोप लगाउँदै दुई देशबीचको व्यापारिक सम्बन्ध असन्तुलित रहेको दाबी गरे। क्यानाडाले आफ्नो अधिकांश व्यापार अमेरिकासँग गर्ने भए पनि अमेरिकाले क्यानाडासँग तुलनात्मक रूपमा कम व्यापार गर्ने उनको भनाइ थियो ।
‘उनीहरू संयुक्त राज्य अमेरिकासँग इमानदार छैनन् । उनीहरूले हामीलाई वर्षौंदेखि छेड्दै आएका छन्,’ ट्रम्पले भने।
यद्यपि, उनले व्यापार विवाद अन्ततः समाधान हुने विश्वास व्यक्त गरे। तर, क्यानाडासँग वार्ता पुनः सुरु गर्ने कुनै समयसीमा वा त्यसका लागि आवश्यक सर्तबारे उनले स्पष्ट जानकारी दिएनन् ।
ट्रम्पका आरोप पुष्टि गर्ने ठोस तथ्याङ्क वा उदाहरण भने उक्त कुराकानीका क्रममा प्रस्तुत गरिएको थिएन ।
