एमसीए–नेपालले तनहुँ जिल्लाको दमौलीमा ४०० केभी क्षमताको नयाँ दमौली सबस्टेसन निर्माणका लागि भारतको टेक्नो इलेक्ट्रिक एण्ड इन्जिनियरिङ लिमिटेडसँग ३.८८ करोड अमेरिकी डलरको ठेक्का सम्झौता गरेको छ । सो सम्झौतामा हस्ताक्षर भएको जनाउँदै नेपालस्थित अमेरिकी दूतावासले एमसिए नेपाल र सबै सरोकारवालाहरुलाई बधाई ज्ञापन गरेको छ ।
उक्त सम्झौतासँगै तीनवटा ४०० केभी सबस्टेशनहरूको निर्माणका लागि सबै सम्झौता प्रक्रिया पूर्ण भएको पनि दूतावासले जनाएको छ । नयाँ दमौली सबस्टेशनले रातमाटे, लेखनाथ र नयाँ बुटवल सबस्टेशनहरूसँग ऊर्जा प्रवाहको लागि महत्वपूर्ण बिन्दुको रूपमा काम गर्ने दूतावासको विश्वासको छ ।
कार्यक्रममा नेपालका लागि अमेरिकी राजदूत डिनआर थम्प्सन, अर्थ मन्त्रालयका सचिव डा. रामप्रसाद घिमिरे, एमसीए–नेपालका सञ्चालक समितिका सदस्यहरू, नेपाल सरकार, अमेरिकी दूतावासका अधिकारीहरू र अन्य विशिष्ट व्यक्तित्वहरूको उपस्थिति थियो ।
यस वर्ष अमेरिका र नेपालबीचको बलियो द्विपक्षीय सम्बन्धको ७७ वर्ष मनाइने भएको छ । दूतावासले फेशबुकमार्फत भनेको छ, ‘१९४७ देखि हाम्रो मित्रता खुला, जवाफदेही, र सहकार्यमा आधारित रहँदै आएको छ । मिलेनियम च्यालेन्ज कर्पोरेशन यस साझेदारीको गर्व योग्य हिस्सा रहेको छ जसले समावेशी र दिगो आर्थिक वृद्धिको माध्यमबाट गरिबी घटाउन कार्य गर्दै आएको छ ।’
