नेपालले आइसिसी क्रिकेट विश्वकप लिग २ अन्तर्गतको त्रिकोणात्मक सिरिजको पहिलो खेल आइतबार अमेरिकाविरुद्ध खेल्दैछ । दुबईस्थित दुबई इन्टरनेसनल क्रिकेट स्टेडियममा हुने यो खेल नेपाली समय अनुसार बिहान ११: १५ बजेदेखि सुरु हुदैछ ।
आइसिसीको एकदिवसीय वरियतामा नेपाल हाल १७औँ स्थानमा छ भने अमेरिका १४औँ स्थानमा रहेको छ । एकदिवसीय अन्तर्राष्ट्रिय खेलमा नेपाल र अमेरिका हालसम्म ९ पटक आमने सामने भएका छन् । जसमा दुवै देशले ४-४ खेल जितेका छन् । त्यस्तै एक खेल टाई भएको थियो ।
एकदिवसीय मान्यता पाएपछि नेपाल र अमेरिकाबिचको पहिलो खेल २०२० को फेब्रुअरीमा टियु क्रिकेट मैदानमा भएको थियो, जुन खेल नेपालले ३५ रनले जितेको थियो । त्यस्तै दोस्रो खेल फेब्रुअरी, १२, २०२० मा टियु मैदानमै भएको थियो, जुन नेपालले ८ विकेटले जितेको थियो । त्यस्तै चौथो खेल २०२१ को सेप्टेम्बर १३ मा ओमानको अल अमेरत मैदानमा भएको थियो, जुन खेल नेपालले ५ विकेटले जितेको थियो । त्यसपछि ओमानमै सेप्टेम्बर १७, २०२१ मा भएको चौथो खेलमा अमेरिकाले ६ विकेटले जितेको थियो ।
त्यस्तै अमेरिकाको टेक्सासमाजुन ११, २०२२ मा भएको खेल टाई भएको थियो भने जुन १५, २०२२ मा टेक्ससमै भएको खेलमा अमेरिका ३९ रनले विजयी भएको थियो । त्यसपछि जुन २०, २०२३ मा जिम्बाबेको हरारेमा भएको खेलमा नेपाल ६ विकेटले विजयी भएको थियो । त्यसपछि अक्टोबर २७, २०२४ मा अमेरिकाको डल्लासमा भएको खेलमा अमेरिका ३ विकेटले विजयी भएको थियो भने नोभेम्बर २, २०२४ मा अमेरिकामै भएको खेलमा अमेरिका ३७ रनले विजयी भएको थियो ।
हालसम्म आइसिसी क्रिकेट विश्वकप लिग २ को अङ्क तालिकामा अमेरिका २० खेल खेल्दै २८ अङ्कसहित दोस्रो स्थानमा रहेको छ । अमेरिकाले २० मध्ये १४ खेल जितेको छ भने ६ खेलमा हार बेहोरेको छ । त्यसै गरी नेपालले भने अहिलेसम्म खेलेका १६ खेलमा केवल ५ खेल जितेको छ भने २ खेलमा अङ्क बाँडेको छ । त्यस्तै ९ खेलमा हार बेहोरेको छ ।
यस सिरिजका लागि छानिएको नेपाली टिममा रोहित पौडेल (कप्तान), दीपेन्द्र सिंह ऐरी (उपकप्तान), असिफ सेख, सन्दीप लामिछाने, कुशल भुर्तेल, अनिल कुमार शाह, सोमपाल कामी, आरिफ सेख, भीम सार्की, करण केसी, गुलशन झा, साहब आलम, नन्दन यादव, कुशल मल्ल र ललित राजवंशी रहेका छन् ।
अक्टोबर २६ देखि नोभेम्बर ५ सम्म अमेरिका र युएईसँग हुने यस त्रिकोणात्मक सिरिजमा अक्टोबर २६ आइतबार नेपाल र अमेरिका, अक्टोबर २८ मंगलबार युएई र अमेरिका, अक्टोबर ३० बिहीबार नेपाल र युएई, नोभेम्बर १ शनिवार नेपाल र अमेरिका, नोभेम्बर ३ सोमबार युएई र अमेरिका र नोभेम्बर ६ बुधवार नेपाल र युएई खेल्ने तालिका रहेको छ ।
