चीनको पश्चिमी प्रान्त गान्सुको पहाडी क्षेत्रमा गएको पहिरोपछि कम्तीमा १६ जना अझै पनि पुरिएको चिनियाँ सरकारी सञ्चारमाध्यमले जनाएको छ । सरकारी टेलिभिजन सीसीटीभीका अनुसार प्रारम्भमा ३३ जना पहिरोमा फसेका थिए । तीमध्ये १७ जनाको सफल उद्धार गरिएको छ भने बाँकी १६ जनाको खोजी तथा उद्धार कार्य तीव्र रूपमा जारी छ ।
चीनका राष्ट्रपति सिन जिनपिङले प्रभावितहरूको उद्धारका लागि सबै सम्भावित प्रयास गर्न सम्बन्धित निकायलाई निर्देशन दिएका छन् । मंगलबार गएको उक्त पहिरोको कारण अझै खुलेको छैन । यद्यपि पछिल्ला केही दिनयता चीनका विभिन्न क्षेत्रमा भीषण वर्षा र आँधीका कारण प्राकृतिक विपद्का घटना बढिरहेका छन् ।
यसैबिच, सरकारी समाचार संस्था सिन्ह्वाका अनुसार सोमबार राति मध्य चीनको हुबेई प्रान्तको पूर्वी क्षेत्रमा आएको भीषण आँधीका कारण कम्तीमा आठ जनाको मृत्यु भएको छ भने एक जना अझै बेपत्ता छन् । ह्वाङ्शी, ह्वाङ्गाङ, एझोउ र सियानिङ सहरमा प्रतिघण्टा १४९ किलोमिटरसम्मको वेगले हुरी चलेको थियो । यस घटनामा मंगलबार बिहानसम्म कम्तीमा २७५ जना घाइते भएको जनाइएको छ ।
चीनको राष्ट्रिय मौसम विज्ञान केन्द्रले आगामी २४ घण्टामा दक्षिणपूर्वी गुआङ्सी तथा पूर्वी जियाङ्सु र शान्दोङ प्रान्तमा २६० मिलिमिटरसम्म वर्षा हुन सक्ने चेतावनी दिएको छ । यस्तो भारी वर्षाले पहिरोको जोखिम बढाउने बताइएको छ । साथै, उत्तरपूर्वी र दक्षिणी चीनका केही क्षेत्रमा आँधीबेहरी र टोर्नाडोको सम्भावना पनि औँल्याइएको छ ।
यसका अतिरिक्त, चीन हाल प्रशान्त महासागरबाट ताइवानतर्फ अघि बढिरहेको शक्तिशाली सुपर टाइफुन बाभीको जोखिममा पनि रहेको छ । अमेरिकी राष्ट्रिय मौसम सेवाका अनुसार सोमबार उक्त आँधीमा प्रतिघण्टा २९० किलोमिटरसम्मको वेगमा हावा चलिरहेको थियो, जसले गुआम, टिनियन, साइपान र रोटा क्षेत्रलाई प्रभावित बनाउँदै अघि बढिरहेको छ ।
