अमेरिकामा आज (नोभेम्बर ३ तारिख) मध्यावधि निर्वाचन हुँदै छ। नेपाली समयअनुसार अपराह्न साढे ४ बजेतिर मतदान सुरु हुनेछ।
यो चुनावअन्तर्गत अमेरिकी संसद्को तल्लो सदन हाउस अफ रिप्रेजेन्टेटिभ्स (प्रतिनिधि सभा) का सबै ४३५ सिट र माथिल्लो सदन सिनेटका ३५ सिटका लागि मतदान हुनेछ।
अमेरिकामा राष्ट्रपति चुनावको ठिक दुई वर्षपछि मध्यावधि चुनाव हुन्छ। निर्वाचनमा संसद्का सिट र केही राज्यमा गभर्नरका पदका लागि मतदान हुने गर्छ।
हाल संसद्का दुवै सदनमा ट्रम्पको रिपब्लिकन पार्टीले बहुमत छ। यदि पार्टीले यीमध्ये एउटा सदनमा मात्र बहुमत गुमायो भने ट्रम्पलाई आफ्नो एजेन्डासँग सम्बन्धित कानुन पारित गर्न गाह्रो हुनेछ।
अमेरिकी कंग्रेसमा बहुमतको गणित
अमेरिकी कंग्रेसका दुवै सदनमा बहुमत हासिल गर्न फरक-फरक संख्यामा सिट आवश्यक पर्छ। सिनेटमा बहुमतका लागि ५१ सिट आवश्यक पर्छ।
सिनेटमा कुल १०० सिट छन्। हाल रिपब्लिकन पार्टीसँग ५३ सिट छन् भने डेमोक्र्याटिक पार्टीसँग ४५ सिट छन्। अनि डेमोक्र्याटिकसँग काम गर्ने दुई स्वतन्त्र सांसद छन्। यसले दुई दलबिच ५३-४७ सिटको अनुपात सिर्जना गरेको छ।
बहुमतका लागि ५१ सदस्यको समर्थन चाहिन्छ। दुवै दलसँग ५०-५० सिट भए भने उपराष्ट्रपति जेडी भान्सले निर्णायक मत दिन सक्छन्।
यसपटक सिनेटका ३५ सिटका लागि मतदान हुँदै छ। यीमध्ये २२ रिपब्लिकन पार्टीको र १३ डेमोक्र्याटिक पार्टीका छन्। डेमोक्र्याटिकहरूलाई बहुमत हासिल गर्न कम्तीमा ४ सिट आवश्यक छ।
हाउस अफ रिप्रेजेन्टेटिभ्समा बहुमतका लागि २१८ सिट आवश्यक
अमेरिकी संसद्को तल्लो सदन हाउस अफ रिप्रेजेन्टेटिभ्समा कुल ४३५ सिट छन्। बहुमतका लागि २१८ सिट आवश्यक पर्छ। यसपटक हाउसका सबै ४३५ सिटका लागि चुनाव हुँदै छ, जसको अर्थ प्रत्येक सिटमा प्रतिस्पर्धा हुनेछ। २१८ वा सोभन्दा बढी सिट जित्ने पार्टीले हाउसमा बहुमत प्राप्त गर्नेछ।
यसरी मध्यावधि चुनावमा रिपब्लिकन पार्टीले दुवै सदनमा बहुमत कायम राख्नुपर्नेछ भने डेमोक्र्याटले दुवै सदनमा बहुमत प्राप्त गर्ने लक्ष्य राख्नेछन्।
