चीन र आईएमएफको ११ करोड अनुदान र ऋण स्वीकार्ने सरकारको निर्णय

Image
मन्त्रिपरिषद् बैठकको निर्णय सार्वजनिक काठमाडौँ, ४ कात्तिकः सञ्चार तथा सूचना प्रविधिमन्त्री डा विक्रम तिमिल्सिना प्रधानमन्त्री तथा मन्त्रिपरिषदको कार्यालय सिंहदरबारमा शुक्रबार बसेको मन्त्रिपरिषद् बैठकको निर्णय सार्वजनिक गर्नुहुँदै । तस्बिरः प्रदीपराज वन्त/रासस

सरकारले चीनबाट प्राप्त हुने २० लाख अमेरिकी डलर अनुदान र अन्तर्राष्ट्रिय मुद्रा कोष (आईएमएफ) बाट प्राप्त हुने १० करोड ७० लाख अमेरिकी डलर सहुलियतपूर्ण ऋण स्वीकार गर्ने निर्णय गरेको छ ।

मन्त्रिपरिषद्को शुक्रबार बसेको बैठकले चीन सरकारले अनुदानस्वरूप उपलब्ध गराउने २० लाख अमेरिकी डलर स्वीकार गर्ने निर्णय गरेको हो ।

बैठकले अन्तर्राष्ट्रिय मुद्रा कोषले उपलब्ध गराउने १० करोड ७० लाख अमेरिकी डलर सहुलियतपूर्ण ऋण स्वीकार गर्ने निर्णयसमेत गरेको सूचना तथा सञ्चारमन्त्री डा. विक्रम तिमिल्सिनाले जानकारी दिए।

यसैगरी, सरकारी, सार्वजनिक तथा सामुदायिक जग्गाको नापजाँच गरी लगत तयार गर्न आदेश जारी गर्ने निर्णय पनि बैठकले गरेको छ ।

मन्त्रिपरिषद्ले राष्ट्रिय जैविक विविधता रणनीति तथा कार्ययोजना (२०२६–२०३०), ऐतिहासिक, पुरातात्त्विक तथा सांस्कृतिक सम्पदा संरक्षणसम्बन्धी मापदण्ड, २०८३ र राष्ट्रिय झोलुङ्गे पुल नीति, २०८३ स्वीकृत गर्ने निर्णय गरेको मन्त्री तिमिल्सिनाले बताए।