आईसीसी क्रिकेट विश्वकप लिग–२ अन्तर्गत आजको खेलमा नेपाल राष्ट्रिय क्रिकेट टोली ले स्कटल्यान्ड राष्ट्रिय क्रिकेट टोली विरुद्ध टस हारेर पहिले बलिङ गर्ने भएको छ ।
स्कटल्यान्डले टस जितेर पहिले ब्याटिङ गर्ने निर्णय गरेको हो । अमेरिकाविरुद्ध शानदार जित निकालेको टोलीलाई नै निरन्तरता दिँदै नेपालले पहिलो रोजाइमा कुनै परिवर्तन गरेको छैन । अघिल्लो खेलमा एकदिवसीय अन्तर्राष्ट्रियमा डेब्यु गरेका इशान पाण्डेले आज पनि टोलीमा स्थान बनाएका छन् ।
यता स्कटल्यान्डका ओली जोन्सले आज एकदिवसीय अन्तर्राष्ट्रियमा डेब्यु गर्दैछन् । यसअघि यही सिरिजअन्तर्गत भएको भेटमा नेपाल स्कटल्यान्डसँग डीएलएस पद्धतिमा २ रनले पराजित भएको थियो । त्यसपछि अमेरिकालाई ९ विकेटले हराएको नेपाल आज जितको लय कायम राख्ने लक्ष्यसहित मैदानमा उत्रिएको हो ।
लिग–२ को अंकतालिकामा नेपाल २६ खेलबाट २० अंकसहित सातौँ स्थानमा छ । शीर्ष स्थानमा रहेको स्कटल्यान्डको ३० खेलबाट ३८ अंक रहेको छ । आजको खेलमा स्कटल्यान्डलाई पराजित गर्न सके नेपालको स्थान सुधार हुने सम्भावना रहेको छ ।
