बेलायतका नवनियुक्त प्रधानमन्त्री एन्डी बर्नह्यामले पदभार सम्हालेको एक सातापछि आफ्नो पहिलो विदेशी अतिथिका रूपमा युक्रेनी राष्ट्रपति भोलोदिमर जेलेन्स्कीलाई सोमबार लन्डनमा स्वागत गर्दै युक्रेनप्रतिको बेलायतको समर्थन अटुट रहने प्रतिबद्धता दोहो¥याउने भएका छन् ।
डाउनिङ स्ट्रिटका अनुसार दुवै नेताले बेलायती नौसैनिक अड्डाको संयुक्त भ्रमण गर्नुका साथै बेलायतमा तालिम लिइरहेका युक्रेनी सैनिक तथा उनीहरूलाई प्रशिक्षण दिइरहेका बेलायती सैन्य अधिकारीसँग भेटघाट गर्ने कार्यक्रम छ । उक्त तालिम कृष्ण सागर क्षेत्रमा भविष्यको सुरक्षासम्बन्धी अभियानका लागि केन्द्रित रहेको जनाइएको छ ।
प्रधानमन्त्री बर्नह्यामले बेलायत युक्रेनसँग निरन्तर काँधमा काँध मिलाएर उभिने र दीर्घकालीन तथा न्यायपूर्ण शान्ति स्थापना नभएसम्म आफ्नो समर्थन कायम रहने स्पष्ट पारेका छन् । उनले रुसले बेलायतको प्रतिबद्धतामाथि कुनै शङ्का नगर्नुपर्ने पनि बताएका छन् ।
भ्रमणका क्रममा बेलायतले ‘स्टोन क्लोक’ नामक युद्धमै परीक्षण गरिएको नयाँ इलेक्ट्रोनिक जामिङ प्रविधिको बौद्धिक सम्पत्ति युक्रेनसँग साझेदारी गर्ने घोषणा पनि गर्ने भएको छ । ड्रोनमा जडान गर्न मिल्ने यो सैन्य उपकरणले रूसी हवाई प्रतिरक्षा प्रणालीलाई ड्रोन पहिचान र लक्षित गर्न अवरोध सिर्जना गर्ने क्षमता राख्ने बताइएको छ ।
डाउनिङ स्ट्रिटका अनुसार उक्त प्रविधि गत वर्ष सम्पन्न १०० वर्षे बेलायत–युक्रेन साझेदारी सम्झौताअन्तर्गत विकसित गरिएको हो । यसअघि हजारौँ जामिङ उपकरण युक्रेनी सेनालाई उपलब्ध गराइसकिएको र भविष्यमा दुवै देशले संयुक्त उत्पादनको सम्भावनासमेत अघि बढाउने तयारी गरेका छन् ।
बेलायतले रुसको पूर्ण आक्रमण सुरु भएयता युक्रेनलाई करिब २५ अर्ब पाउण्ड बराबरको सहयोग उपलब्ध गराएको जनाएको छ । सोमध्ये १६ अर्ब पाउण्ड प्रत्यक्ष सैन्य सहयोग रहेको छ ।
लन्डन भ्रमणपछि राष्ट्रपति जेलेन्स्की मङ्गलबार वासिङ्टन पुग्ने कार्यक्रम छ । त्यहाँ उनले अमेरिकी राष्ट्रपति डोनाल्ड ट्रम्पसँग भेटवार्ता गर्नुका साथै हालै निधन भएका युक्रेन समर्थक अमेरिकी सिनेटर लिन्डसे ग्राहमको अन्त्येष्टिमा पनि सहभागी हुने अपेक्षा गरिएको छ ।
