नेपाल राष्ट्र बैंकको मौद्रिक व्यवस्थापन विभागले वित्तीय बजारबाट ८५ अर्ब रुपैयाँ बराबरको ६ महिने निक्षेप संकलन गर्नका लागि बोलकबोल आह्वान गरेको छ ।
बैंकले १७५ दिनको अवधिका लागि यो निक्षेप संकलन उपकरण निष्कासन गर्न लागेको हो । यसका लागि आजै दिउँसो ३ बजेसम्म बोलकबोल खुला रहने राष्ट्र बैंकले जनाएको छ ।
राष्ट्र बैंकको सूचना अनुसार यो बोलकबोल प्रक्रिया पूर्ण रूपमा अनलाइन बिडिङ सिस्टम सफ्टवेयर मार्फत मात्र सञ्चालन गरिनेछ । यस उपकरणको निष्कासन पनि आजै अर्थात् २०८३ भदौ ५ गते नै गरिनेछ भने यसको ब्याजदर बोलकबोलकै माध्यमबाट निर्धारण हुनेछ ।
यस निक्षेप संकलन उपकरणको बोलकबोलमा नेपाल राष्ट्र बैंकबाट इजाजतपत्र प्राप्त ुकु, ुखु र ुगु वर्गका बैंक तथा वित्तीय संस्थाहरू मात्र सहभागी हुन पाउनेछन् । बोलकबोलमा सहभागी हुन चाहने योग्य संस्थाहरूले कम्तीमा १० करोड रुपैयाँ र बढीमा १० करोड रुपैयाँले भाग गर्दा निःशेष भाग जाने गरी कुल आह्वान रकम (८५ अर्ब रुपैयाँ) सम्म बोलकबोल गर्न सक्नेछन् ।
सूचनाअनुसार बोलकबोलमा सहभागी हुने संस्थाहरूले निक्षेपबापत जम्मा गर्न चाहेको रकम र आफूले प्रस्ताव गरेको ब्याजदर (दशमलव पछाडिको हकमा चार अंकसम्म) स्पष्ट रूपमा उल्लेख गर्नुपर्नेछ ।
आह्वान गरिएको रकम बाँडफाँड गर्दा सबैभन्दा कम ब्याजदर प्रस्ताव गर्ने बोलकर्तालाई पहिलो प्राथमिकता दिइनेछ र सोही क्रममा रकम क्रमशः बाँडफाँड गरिनेछ। यदि समान ब्याजदर प्रस्ताव गरिएका बोलपत्रहरूको कुल रकम निष्कासन गर्न लागिएको सीमाभन्दा बढी भएमा प्रो-राटा बेसिसमा बाँडफाँड गरिने राष्ट्र बैंकले स्पष्ट पारेको छ ।
यसका साथै, आह्वान गरिएको रकममध्ये सम्पूर्ण वा आंशिक बोलपत्र स्वीकार वा अस्वीकार गर्ने पूर्ण अधिकार राष्ट्र बैंकको मौद्रिक व्यवस्थापन विभाग वा खुला बजार कारोबार संचालन समितिलाई रहने जनाइएको छ ।
