युवा, श्रम तथा रोजगार मन्त्रालयले सुनसरीको इटहरीमा असोज १४ गतेदेखि २० गतेसम्म ‘सीप तथा रोजगार मेला, २०८३’ आयोजना गर्ने भएको छ ।
बुधबार सिंहदरबारमा पत्रकार सम्मेलन गर्दै मन्त्रालयले सरकारले घोषणा गरेको रोजगार दशकलाई अघि बढाउने सन्दर्भमा सीप र रोजगारी : साझा जिम्मेवारी भन्ने नाराका साथ सीप तथा रोजगार मेला आयोजना गर्न लागिएको जनाएको हो ।
माग, सीप तालिम, रोजगारलाई एउटै प्रणालीमा आबद्ध गर्ने अवधारणाका साथ सुरु हुन लागेको मेलामा उद्योग, सेवा, कृषि, निर्माण लगायतका १० वटा विभिन्न विधामा ६५ वटा स्टलहरू रहने मन्त्रालयले जनाएको छ ।
उद्योगको मागअनुसार सीपयुक्त जनशक्ति उत्पादन गर्ने, तालिम सञ्चालन गरी रोजगारी सुनिश्चित गर्ने तथा रोजगारदाता र रोजगार खोज्ने व्यक्तिबीच प्रत्यक्ष सम्पर्क स्थापित गराउनेका साथै हुन लागेको मेला अन्य प्रदेशमा पनि आयोजना गरिने युवा, श्रम तथा रोजगारमन्त्री रामजी यादवले जानकारी दिए ।
उनले स्वदेशमै आफ्नै माटोमा रोजगारी र स्वरोजगारी दुवैको वातावरण सिर्जना गर्नु जनता र युवाहरूको मुख्य माग रहेको र सोहीअनुसार सरकारले नीतिगत सुधार एवं कार्यक्रमहरू अघि बढाइरहेको बताए । राष्ट्रिय रोजगार नीति छिटै मन्त्रिपरिषद् पठाउने तयारी भइरहेको उनको भनाइ छ ।
उनले वैदेशिक रोजगारीका लागि विभाग र बोर्ड भए जस्तै आन्तरिक रोजगारीका लागि संयन्त्र नहुँदा अहिले मेला आयोजना गर्न मन्त्रालयका सम्पूर्ण महाशाखाहरू नै प्रत्यक्ष खटिनुपरेको अवस्था रहेको गुनासो गरे ।
कति जनाले प्रत्यक्ष रोजगारी पाए र कति जना सिफारिस भए भन्ने विषयलाई मेलाको सफलताको मुख्य सूचक मानिने उनले बताए ।
