काठमाडौँको ठमेल क्षेत्रमा अश्लिल क्रियाकलापमा संलग्न भएको आरोपमा प्रहरीले सातजना विदेशी महिलालाई पक्राउ गरेको छ।
प्रहरी वृत्त लैनचौरबाट खटिएको टोलीले काठमाडौँ महानगरपालिका–२६ ठमेल क्षेत्रमा जथाभावी बाटो छेकेर अश्लील क्रियाकलाप गर्ने र कार्यक्षेत्रमा रहेका प्रहरीमाथि नै अभद्र व्यवहार गर्ने सात विदेशी महिलालाई पक्राउ गरेको हो।
जिल्ला प्रहरी परिसर काठमाडौँका प्रवक्ता, प्रहरी उपरीक्षक पवनकुमार भट्टराईले ठमेल क्षेत्रमा हिँडडुल गर्ने स्वदेशी तथा विदेशी पर्यटक र सर्वसाधारणलाई अनावश्यक रूपमा बाटो छेकी अश्लील क्रियाकलापसम्बन्धी मोलमोलाइ गरी दुःख हैरानी दिएको गुनासोको आधारमा उनीहरुलाई पक्राउ गरिएको जानकारी दिए।
उनीहरुले कार्यक्षेत्रमा खटिएका प्रहरी कर्मचारलाई अपशब्द प्रयोग गरी गालीगलौज गर्ने र धक्कामुक्का गरेको प्रहरीले जनाएको छ।
पक्राउ परेकालाई आवश्यक अनुसन्धानका लागि जिल्ला प्रशासन कार्यालय काठमाडौँबाट पाँच दिनको म्याद थप गरी अनुसन्धान भइरहेको प्रवक्ता भट्टराईले बताए।
