संघीय संसद्अन्तर्गत प्रतिनिधिसभाको बैठक आज पनि बस्दैछ। संसद् सचिवालयका अनुसार बैठक बिहान ११ बजे सिंहदरबारस्थित संघीय संसद् भवनमा सुरु हुनेछ।
आजको बैठकमा विनियोजन विधेयक–२०८३ अन्तर्गत विभिन्न मन्त्रालय तथा निकायहरूको बजेटमाथि मन्त्रालयगत छलफल हुने कार्यसूची रहेको छ। छलफलका लागि विज्ञान, प्रविधि तथा नवप्रवर्तन मन्त्रालय, कानुन, न्याय तथा संसदीय मामिला मन्त्रालय, पूर्वाधार विकास मन्त्रालय, गृह मन्त्रालय, ऊर्जा, जलस्रोत तथा सिँचाइ मन्त्रालय, परराष्ट्र मन्त्रालय, अर्थ मन्त्रालय, रक्षा मन्त्रालय तथा प्रधानमन्त्री तथा मन्त्रिपरिषद्को कार्यालयको बजेट समावेश गरिएको छ।
यस्तै, राष्ट्रिय योजना आयोगको सचिवालय, राष्ट्रपति कार्यालय र उपराष्ट्रपति कार्यालयको बजेटमाथि पनि सांसदहरूले आफ्नो धारणा राख्नेछन्।
बैठकका क्रममा विभिन्न मन्त्रालय तथा निकायका लागि प्रस्तावित खर्च रकममाथि सांसदहरूले खर्च कटौतीका प्रस्तावसमेत प्रस्तुत गर्ने कार्यसूची रहेको संसद् सचिवालयले जनाएको छ।
यसैबीच, सभामुखले प्रतिनिधिसभाका पूर्व सदस्य मंगल प्रसाद गुप्ताको निधनप्रति श्रद्धाञ्जली व्यक्त गर्दै शोक प्रस्ताव प्रस्तुत गर्ने कार्यक्रम पनि तय गरिएको छ।
विनियोजन विधेयकमाथिको मन्त्रालयगत छलफलसँगै सरकारको आगामी आर्थिक वर्षको बजेट र खर्च प्राथमिकताबारे संसद्मा व्यापक बहस हुने अपेक्षा गरिएको छ।
