इराकको राजधानी बगदादमा काम गरिरहेकी एक अमेरिकी स्वतन्त्र पत्रकारको मंगलबार अपहरणमा परेकी छन्। इराकको गृह मन्त्रालय र अमेरिकी विदेश मन्त्रालयका अधिकारीहरूले पत्रकार शेली किटलसनअपहरणमा परेको पुष्टि गरेका हुन्। गृह मन्त्रालयका अनुसार किटलसनलाई बगदादको सडकबाट गाडीमा जबर्जस्ती हालेर लगिएको थियो। सुरक्षा क्यामेरामा कैद भएको दृश्यमा उनी फुटपाथमा उभिएकी बेला एउटा सिल्भर रंगको कार नजिक आइपुग्छ र केही व्यक्तिले उनलाई बलपूर्वक कारतर्फ धकेल्दै लगेपछि गाडी तीव्र गतिमा भागेको देखिन्छ।
घटनापछि इराकी सुरक्षा निकायले अपहरणकारीहरूको खोजी तीव्र पारेको थियो। खोजीका क्रममा उनीहरूको गाडी पछ्याउँदा दुर्घटनाग्रस्त भएपछि एक संदिग्धलाई पक्राउ गरिएको गृह मन्त्रालयले जनाएको छ। अमेरिकी विदेश मन्त्रालयका ग्लोबल पब्लिक अफेयर्सका सहायक सचिव डिलन जोनसनका अनुसार पक्राउ परेका व्यक्तिको इरान समर्थित मिलिसिया समूह ‘कताइब हिजबुल्लाह’ सँग सम्बन्ध रहेको आशंका गरिएको छ।
अमेरिकी अधिकारीहरूका अनुसार किटलसनलाई सम्भावित खतराबारे विदेश मन्त्रालयले पहिले नै चेतावनी दिएको थियो। उनलाई विभिन्न समयमा खतरा सम्बन्धी सूचना दिइएको थियो र सोमबार रातिसम्म पनि सावधानी अपनाउन भनिएको बताइएको छ। तर खतरा के प्रकारको थियो भन्ने विवरण सार्वजनिक गरिएको छैन। अमेरिकी विदेश मन्त्रालयले इराकी अधिकारीहरूसँग समन्वय गरेर घटनाको अनुसन्धान भइरहेको जनाएको छ। मन्त्रालयले एफबीआईसँग पनि सहकार्य गर्दै किटलसनलाई छिटोभन्दा छिटो सुरक्षित रूपमा मुक्त गराउने प्रयास भइरहेको बताएको छ।
किटलसनले मध्यपूर्व र अफगानिस्तानसम्बन्धी विषयमा रिपोर्टिङ गर्दै आएकी छन्। उनी हाल रोममा आधारित पत्रकार हुन् र अल–मोनिटरका लागि काम गर्दै आएकी थिइन्। यसअघि उनले विदेश नीति, राजनीति र बीबीसी विश्व सेवाजस्ता अन्तर्राष्ट्रिय सञ्चारमाध्यममा पनि काम गरिसकेकी छन्। अल–मोनिटरले एक विज्ञप्ति जारी गर्दै किटलसनको “सुरक्षित र तत्काल रिहाइ” को माग गरेको छ। उनको क्षेत्रीय रिपोर्टिङ अत्यन्त महत्वपूर्ण भएको भन्दै उनलाई छिटो काममा फर्कन सक्ने अवस्था बनाउन आग्रह गरेको छ।
यस घटनापछि अमेरिकी विदेश मन्त्रालयले सबै अमेरिकी नागरिकलाई “कुनै पनि कारणले इराक यात्रा नगर्न” र त्यहाँ रहेका अमेरिकीलाई सकेसम्म छिटो देश छाड्न आग्रह गरेको छ।
