काठमाडौंस्थित केन्द्रीय कारागार कार्यालय जगन्नाथदेवलमा रहेका एक कैदीलाई कारागारबाट बाहिर निकालेर होटलमा लगेको घटनामा संलग्न दुई जना प्रहरी कर्मचारी बर्खास्त भएका छन्।जेठ १ गते कारागारमा रहेका अनुप भण्डारी नामका कैदीलाई हतकडीसमेत नलगाई होटल लगिएको घटना सार्वजनिक भएपछि छानबिन गरिएको थियो। छानबिनबाट प्रहरी सहायक हवल्दार होमबहादुर कुँवर र प्रहरी जवान टेकबहादुर विकले कैदीलाई कारागारबाट बाहिर लगेको खुलेको हो।
काठमाडौं उपत्यका प्रहरी कार्यालय रानीपोखरीका डिआइजी ओम अधिकारीका अनुसार दुवै प्रहरीमाथि विभागीय छानबिन गरी बर्खास्त गरिएको छ।‘उनीहरूमाथि आवश्यक छानबिन सम्पन्न भएपछि बर्खास्त गरिएको हो,’ डिआइजी अधिकारीले बताए।प्रहरी स्रोतका अनुसार ती प्रहरीहरूले कैदी भण्डारीलाई होटलमा लगेर मासु र बियर खुवाउनुका साथै एक युवतीसँग भेटघाट गराउने व्यवस्था समेत मिलाएका थिए।प्रारम्भिक अनुसन्धानमा कैदीलाई उपचारका लागि अस्पताल लैजाने बहाना बनाएर कारागारबाट बाहिर निकालिएको देखिएको छ। तर अस्पताल लैजानुको सट्टा होटलमा लगिएको तथ्य फेला परेको स्रोतको दाबी छ।
घटनाले कारागार सुरक्षा व्यवस्थामाथि गम्भीर प्रश्न उठाएको छ। प्रहरी नेतृत्वले यस्ता गतिविधिमा संलग्न कर्मचारीमाथि शून्य सहनशीलताको नीति अपनाइने जनाएको छ भने घटनाबारे थप अनुसन्धान जारी रहेको बताइएको छ।
