बागमती प्रदेश सरकारले चालु आर्थिक वर्ष २०८२–८३ को पहिलो १० महिनामा ३१ अर्ब ३३ करोड ५५ लाख ४८ हजार रुपैयाँ राजस्व संकलन गरेको छ ।
घरजग्गा रजिष्ट्रेसन र सवारीसाधन कर प्रदेश सरकारको प्रमुख राजस्व स्रोतका रूपमा रहेको छ । ती शीर्षकसहित बाँडफाँटमार्फत साउनदेखि वैशाखसम्मको अवधिमा २० अर्ब १ करोड ३ लाख ८९ हजार रुपैयाँ राजस्व संकलन भएको बागमती प्रदेश सरकारको आन्तरिक मामिला तथा योजना विकास मन्त्रालयका अधिकृत इन्द्रराज सञ्ज्याल ले जानकारी दिएका छन् ।
त्यसैगरी सङ्घीय सरकारबाट प्राप्त हुने समानीकरण अनुदानअन्तर्गत सोही अवधिमा ७ अर्ब ९४ करोड २७ लाख ५६ हजार रुपैयाँ प्राप्त भएको मन्त्रालयले जनाएको छ । प्रदेश सरकारको आन्तरिक स्रोतबाट भने ३ अर्ब २४ करोड ५२ लाख ४१ हजार रुपैयाँ संकलन भएको छ ।
अधिकृत सञ्ज्यालका अनुसार आर्थिक तरलता, घरजग्गा तथा नयाँ सवारीसाधन खरिद–बिक्रीमा आएको गिरावट र गत भदौ २३ र २४ गते भएको ‘जेन–जी’ आन्दोलनका क्रममा राजस्व संकलन गर्ने निकायमा पुगेको क्षतिका कारण अपेक्षाअनुसार राजस्व उठ्न नसकेको हो ।
