रुसले राजधानी मस्कोलक्षित १३९ युक्रेनी ड्रोन रातभरको कारबाहीमा खसालिएको जनाएको छ ।
रुसी हवाई प्रतिरक्षा प्रणालीले रातभरदेखि सोमबार बिहानसम्म ती ड्रोनहरूलाई सफलतापूर्वक निष्क्रिय पारेको मस्कोका मेयर सर्गेई सोब्यानिनको भनाइ छ । सोब्यानिनले टेलिग्राममार्फत जानकारी दिँदै ड्रोनका अवशेष खसेका स्थानमा आपत्कालीन सेवाका टोलीहरू परिचालन गरिएको बताएका छन् ।
यो आक्रमण रुसी राष्ट्रपति भ्लादिमिर पुटिनले अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङसँग भेटवार्ता गर्नुभन्दा केही दिनअघि भएको हो ।
युक्रेनी सेनाले यसअघि रुसभित्रका महत्त्वपूर्ण संरचनालक्षित आक्रमण गरेको थियो । युक्रेनी आक्रमणमा रुसको एक प्रमुख पेट्रोकेमिकल उद्योग, तेल प्रशोधन केन्द्र र सैन्य सामग्री उत्पादन गर्ने कारखानालाई निसाना बनाइएको जनाइएको छ ।
यसैबीच, चिनियाँ विदेश मन्त्रालयले यही नोभेम्बर १९ मा राष्ट्रपति सीले अमेरिकी राष्ट्रपति ट्रम्प र रुसी राष्ट्रपति पुटिनसँग चीनको सेन्जेनमा भेटवार्ता गर्ने पुष्टि गरेको छ । एसिया–प्रशान्त आर्थिक सहयोग (एपेक) शिखर सम्मेलनका अवसरमा हुन लागेको उक्त त्रिपक्षीय भेटवार्ताको विस्तृत कार्यसूची भने सार्वजनिक गरिएको छैन ।
अमेरिकी अधिकारीहरूका अनुसार, ट्रम्पले उक्त भेटमा आणविक हतियार न्यूनीकरण र इरानसँग सम्बन्धित द्वन्द्वका विषयमा छलफल गर्ने तयारी गरेका छन् । तर, रुसले युक्रेनमाथि जारी राखेको युद्धको विषय उक्त त्रिपक्षीय वार्तामा उठाइने सम्भावना नरहेको जनाइएको छ ।
रुस र युक्रेनबीच युद्ध जारी रहँदा दुवै पक्षले एकार्काका महत्त्वपूर्ण सैन्य तथा औद्योगिक संरचनालक्षित आक्रमण तीव्र बनाएका छन् । यस्तो अवस्थामा विश्वका तीन प्रमुख शक्तिका नेताबीच हुन लागेको भेटवार्तालाई अन्तर्राष्ट्रिय समुदायले चासोका साथ हेरिरहेको छ ।















