आइसिसी टी–२० विश्वकप २०२६ अन्तर्गत समूह चरणको तेस्रो खेलमा नेपाल राष्ट्रिय क्रिकेट टोली ले वेस्ट इन्डिज क्रिकेट टोली विरुद्ध सम्मानजनक लक्ष्य प्रस्तुत गरेको छ।
भारतको मुम्बईस्थित वानखेडे रंगशाला मा टस जितेर वेस्ट इन्डिजले बलिङ रोजेपछि पहिले ब्याटिङ गरेको नेपालले निर्धारित २० ओभरमा ८ विकेट गुमाउँदै १३३ रन बनायो र १३४ रनको लक्ष्य दिएको हो।
नेपालको सुरुवात अत्यन्तै निराशाजनक रह्यो। पहिलो ओभरमै कुशल भुर्तेल अकिल हुसेनबाट बोल्ड भए। त्यसपछि कप्तान रोहितकुमार पौडेल ५ रनमै एलबिडब्लू आउट भए। आसिफ शेख पनि ११ रन बनाएर पभेलियन फर्किए।
६ ओभरमा ३ विकेट गुमाएर २२ रन मात्र जोडेको नेपाल थप संकटमा पर्यो। आरिफ शेख, लोकेश बम र गुल्सन झा पनि ठूलो इनिङ खेल्न नसक्दा नेपाल कम स्कोरमै समेटिने खतरा देखिएको थियो। दर्शकदीर्घामा उपस्थित हजारौं समर्थक निराश देखिन थालेका थिए।
संकटमोचक बने दीपेन्द्र
यस्तो अवस्थामा टोलीका उपकप्तान तथा अलराउन्डर दीपेन्द्रसिंह ऐरीले धैर्य र संयमताका साथ इनिङ सम्हाले। सुरुवातमा पिचमा ब्याटिङ गर्न गाह्रो देखिए पनि समयसँगै उनले लय समाते।
दीपेन्द्रले ४७ बलमा ३ चौका र ३ छक्का प्रहार गर्दै ५८ रनको महत्वपूर्ण अर्धशतक बनाए। उनी टी–२० विश्वकपमा नेपालका लागि अर्धशतक बनाउने दोस्रो खेलाडी बने। यसअघि सन् २०१४ मा सुवास खकुरेलले अफगानिस्तानविरुद्ध अर्धशतक बनाएका थिए।
दुई वर्षअघि वेस्ट इन्डिज र अमेरिकामा सम्पन्न विश्वकपमा नेपालका कुनै पनि खेलाडीले अर्धशतक बनाउन सकेका थिएनन्। लामो प्रतिक्षापछि आएको दीपेन्द्रको यो अर्धशतकले टोलीको प्रतिष्ठा जोगाएको छ।
अन्त्यतिर आक्रामक ब्याटिङ
दीपेन्द्रले विशेषगरी सामर जोसेफमाथि आक्रामक प्रहार गरे। १९औं ओभरमा दुई छक्का प्रहार गर्दै उनले रनगति तीव्र बनाए। सातौं विकेटका लागि दीपेन्द्र र सोमपाल कामीबीच ५४ रनको महत्वपूर्ण साझेदारी भयो। सोमपालले १५ बलमा ४ चौकासहित अविजित २६ रन जोडे। १८औं ओभरमा जेसन होल्डरलाई लगातार तीन चौका प्रहार गर्दा नेपालले १६ रन जोड्दै सय रन पार गरेको थियो।
अन्तिम ओभरमा आउट हुनुअघि दीपेन्द्रले टोलीलाई प्रतिस्पर्धी स्कोरसम्म पुर्याए। करण केसी १ रनमा आउट भए।
